काठमाडौं, चैत १४ । राजधानीमा शुक्रबार हुने राजावादी र गणतन्त्रवादी प्रदर्शनलाई लक्षित गर्दै सरकारले सुरक्षा सतर्कता कडा बनाएको छ। गृह मन्त्रालयको निर्देशनअनुसार नेपाल प्रहरीले २५ सयभन्दा बढी सुरक्षाकर्मी परिचालन गर्ने तयारी गरेको छ।
नेपाल प्रहरीका केन्द्रीय प्रवक्ता, प्रहरी नायब महानिरीक्षक (डीआईजी) दिनेशकुमार आचार्यका अनुसार, भोलि हुने प्रदर्शनलाई सुरक्षित र व्यवस्थित बनाउन सादा पोसाकका प्रहरीसमेत खटाइने छ। कुनै पनि अप्रिय घटना हुन नदिन सुरक्षा योजना बनाइएको उनले बताए।
दुई पक्षका लागि अलग-अलग प्रदर्शन स्थल तय गरिएको छ । काठमाडौं प्रशासनले राजावादीहरूको प्रदर्शनका लागि तीनकुने र गणतन्त्रवादीहरूको लागि भृकुटीमण्डप निर्धारण गरेको छ।
गणतन्त्रवादी मोर्चा अन्तर्गत समाजवादी मोर्चामा आबद्ध नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपाले भृकुटीमण्डपमा प्रदर्शन गर्नेछन्।
त्यसैगरी राजावादी मोर्चा अन्तर्गत नवराज सुवेदी नेतृत्वको ‘राजसंस्था पुनस्र्थापनाका लागि संयुक्त जनआन्दोलन समिति’ले दुर्गा प्रसाईंसँग मिलेर प्रदर्शन गर्ने तयारी गरेको छ।
राजधानीको शान्ति सुव्यवस्था कायम गर्न भद्रकालीस्थित जिल्ला प्रहरी परिसर मा ‘कमान्ड सेन्टर’ स्थापना गरिएको छ। ट्राफिक व्यवस्थापनका लागि १८ सय ट्राफिक प्रहरी परिचालन हुने छन्।
राजावादी प्रदर्शनकारीलाई रिङरोडबाहिर मात्रै जुलुस निकाल्न दिइनेछ भने समाजवादी मोर्चाको जुलुस बबरमहलबाट माइतीघर, त्रिपुरेश्वर हुँदै प्रदर्शनीमार्गसम्म निकालिनेछ।
सम्भावित भिडभाडका कारण काठमाडौं उपत्यकाको सवारी आवागमन प्रभावित हुने अनुमान गरिएको छ।
सुरक्षाकर्मीले कुनै पनि अप्रिय घटना हुन नदिन निगरानी बढाउने बताएको छ। शुक्रबारको प्रदर्शन शान्तिपूर्ण रहने वा तनावग्रस्त बन्ने भन्नेमा सुरक्षा अधिकारीहरूले विशेष चासो राखेका छन्।
