काठमाडौँ चैत १५ । गृह मन्त्रालयले राजावादी आन्दोलनलाई विशुद्ध हिंसा, अमानवीय र लुटपाटको लागि गरिएको आरोप लगाएको छ। शुक्रबार साँझ गृह मन्त्रालयमा आयोजित पत्रकार सम्मेलनमा गृह मन्त्रालयका सहसचिव छवि रिजालले आजको आन्दोलन कुनै राजनीतिक उद्देश्यबाट नभएको बताउँदै, सरकारले अब संयमित भएर नबस्ने चेतावनी दिनुभयो।
सहसचिव रिजालका अनुसार आन्दोलनका क्रममा भएको क्षतिको सम्पूर्ण जिम्मेवारी व्यवसायी दुर्गा प्रसाईंले लिनुपर्नेछ। उहाँले आन्दोलनको नेतृत्व लिएको कारण घटनाप्रति प्रसाईं नै जिम्मेवार भएको बताउँदै, हिंसात्मक र लुटपाटका कार्यमा संलग्न जोसुकै भए पनि कानुनी दायरामा ल्याइने स्पष्ट गर्नुभयो।
राजावादीको तीनकुने आन्दोलनका क्रममा सुरक्षाकर्मी र प्रदर्शनकारीबीच झडप हुँदा १५ जना सुरक्षाकर्मी र १५ जना प्रदर्शनकारी गरी ३० जना घाइते भएका छन्। घटनामा २ जनाको मृत्यु भएको छ। भौतिक क्षतिको पूर्ण विवरण आइनसकेको भए पनि संकलनको कार्य भइरहेको छ। आन्दोलनका क्रममा प्रदर्शनकारीले निजी घर, सरकारी सवारी साधन तथा अन्य संरचनामा तोडफोड र आगजनी गरेका छन्। जडिबुटी क्षेत्रमा रहेको जडिबुटी प्रशोधन केन्द्रमा आगजनी गरिनु अमानवीय कार्य भएको मन्त्रालयले जनाएको छ।
व्यक्तिगत सम्पत्ति, अस्पताल, सञ्चार गृह, राजनीतिक दलका कार्यालय, व्यापारिक केन्द्र तथा यातायातका साधनमाथि गरिएको तोडफोड र आगजनी गैरकानुनी तथा भत्र्सनायोग्य रहेको मन्त्रालयको धारणा छ। गृह मन्त्रालयले हिंसात्मक तथा आपराधिक गतिविधिमा संलग्न व्यक्तिहरूलाई कारबाहीको दायरामा ल्याइने जनाएको छ। मन्त्रालयका अनुसार अब सरकारले संयमित नबसी कठोर कदम उठाउनेछ।
