काठमाडौ । तीनकुनेमा राजावादी समूहका कमाण्डर दुर्गा प्रसाईंको नेतृत्वमा भइरहेको आन्दोलनले नयाँ मोड लिएको छ। आन्दोलनको पछिल्लो घटनाक्रममा दुर्गा प्रसाईं तनावग्रस्त अवस्थामा फसेका छन्, जसका कारण प्रदर्शनको स्थिति नियन्त्रण बाहिर गएको प्रहरी प्रशासनको रिपोर्टमा उल्लेख गरिएको छ।
प्रहरीका अनुसार, दुर्गा प्रसाईं आफैं गाडी चलाएर निषेधित क्षेत्र तोड्न प्रयास गरेका थिए र प्रदर्शनकारीलाई उक्साउने काम गरेका थिए। यसको परिणामस्वरूप, प्रहरीले अश्रुग्याँस प्रहार गर्न बाध्य भए, तर प्रदर्शनकारीहरूले प्रतिवाद स्वरूप ढुंगामुडा गर्न थालेपछि स्थिति अझै जटिल भएको हो। प्रदर्शनकारीहरूले निजी घरमा पनि तोडफोड गर्न थाले र आगो लगाईदिए, जसले गर्दा दमकललाई आगो निभाउनसमेत प्रवेश गर्न दिइएन।
स्थिति नियन्त्रणमा लिनको लागि प्रहरीले हवाई फायरसमेत गरेको थियो। यद्यपि, स्थिति अझै उग्र बन्ने क्रममा, दुर्गा प्रसाईं सटरभित्र लुकेर बसेका थिए र हालै एक गाडीमार्फत चुपचाप आन्दोलन स्थल छोडेर भागेका छन्। उनी तीनकुने क्षेत्रबाट निस्किएका छन्, तर उनका ठिक स्थानबारे अहिलेसम्म कुनै जानकारी सार्वजनिक भएको छैन।
यसअघि, दुर्गा प्रसाईंले पूर्वराजा ज्ञानेन्द्र शाहसँग निर्मलनिवासमा भेट गरेका थिए। त्यसपछि उनी र उनका समर्थकहरूलाई अहिले कसरी अघि बढ्ने भन्ने विषयमा रणनीति बनाउनका लागि ज्ञानेन्द्रसँग पुनः सल्लाह गर्ने हल्ला छ।
सरकारले अबको अवस्थामा स्थिति नियन्त्रण गर्नका लागि कडा कदमहरू चाल्न सक्ने संकेत दिइएको छ। सरकारका अनुसार, पूर्वराजा ज्ञानेन्द्र शाहको संलग्नता र प्रसाईंको साथको मुल्याङ्कन गर्दा सरकारले उनलाई पनि निगरानीमा राख्ने तयारी गरेको छ। सरकारले स्पष्ट रुपमा भनेको छ कि दुर्गा प्रसाईंले ज्ञानेन्द्रसँग भेटेर आन्दोलनको रणनीति बनाएको कारण यो परिस्थितिको निर्माणमा ज्ञानेन्द्रको पनि कुनै न कुनै जिम्मेवारी रहेको छ।
सरकारका अधिकारीहरूले यस घटनाको गम्भीरतासाथ समिक्षा गर्न थालेका छन् र आगामी रणनीतिको बारेमा चाँडै निर्णय लिने तयारीमा छन्।
