News Portal

  • चितवन घटना अपडेट:- सुसाईड नोट शालिनकै भएको डाक्टरको पृष्टी

    जनगर्जन संवाददाता२०८० फाल्गुण २२
    ३५ पटक

    चितवन । चितवनको रत्ननगर नगरपालिका–१० स्थित एकता शिशु निकेतनको होस्टेलमा मृत भेटिएकी शालिन पोखरेलको सुसाइड नोटको रिपोर्ट आएको छ । केन्द्रीय प्रहरी विधिविज्ञान प्रयोगशालाले सुसाइड नोटको परीक्षण रिपोर्ट चितवन प्रहरीलाई पठाएको हो ।

    सुसाइड नोटमा लेखिएको अक्षर र १४ वर्षीया पोखरेलको अक्षर ‘म्याच’ भएको छ । विधिविज्ञान प्रयोगशालाबाट ‘कमन अथर’ भनेर रिपोर्ट प्राप्त भएको जिल्ला प्रहरी कार्यालय चितवनका डीएसपी श्रीराम भण्डारीले रातोपाटीलाई बताए । उनले भने,‘मृतकको अक्षर र घटनास्थलमा भेटिएको नोटको अक्षर समान रहेको परीक्षणबाट देखिएको छ ।’

    फागुन १२ मा पोखरेल प्लाष्टिकको डोरीमा झुण्डिएको अवस्थामा मृत भेटिएकी थिइन् । घटना अनुसन्धानका लागि प्रहरीले स्कुलका प्रिन्सिपल, भाइस प्रिन्सिपल र होस्टलको वार्डेनलाई पक्राउ गरेको छ । पक्राउ पर्नेमा रत्ननगर नगरपालिका–१० बस्ने ६० वर्षीय बालहरी देवकोटा, ४० वर्षीय किरण बहादुर अधिकारी र ४८ वर्षका कमल शर्मा पौडेल छन् । उनीहरुविरुद्ध प्रहरीले ज्यान सम्बन्धी कसुरमा अनुसन्धान गरिरहेको छ ।

    यस्तै शालिन पोखरेलको मंगलबार पशुपति आर्यघाटमा अन्त्येष्टि गरिएको छ । मृतकका पिताले छोरीको पार्थिव शरीरमा दाग बत्ती दिएका थिए । त्यहाँ उपस्थित आफन्तले शालिनको मृत्यु प्रकरणमा निष्पक्ष छानबिनको माग गर्दै न्यायका लागि माग गरेका थिए ।

    प्रतिकृया दिनुहोस्