कपिलवस्तु । जिल्ला प्रहरी कार्यालय कपिलवस्तुले फागुन महिनामा मात्रै १२१ जना फरार प्रतिवादीलाई पक्राउ गरेको छ। लामो समयदेखि विभिन्न अपराधमा संलग्न रही फरार रहेका उनीहरूलाई पक्राउ गरी जिल्ला अदालतमा बुझाइएको जिल्ला प्रहरी कार्यालयका प्रहरी नायब उपरीक्षक (प्रनाउ) मोहनमणी अधिकारीले जानकारी दिएका छन्।
प्रनाउ अधिकारीका अनुसार पक्राउ परेकामध्येबाट २५ वर्ष १० महिना ५ दिनको कैद सजाय र रु ४,४५,४५० जरिवाना असुल गरिएको छ। पक्राउ परेका प्रतिवादीहरूलाई फरार अवधि अनुसार वर्गीकरण गर्दा २० वर्षपछि १६ जना, १५ वर्षपछि २२ जना, १० वर्षपछि ११ जना, ५ वर्षपछि १७ जना र पाँच वर्षभन्दा कम समयमा पक्राउ परेका ५४ जना रहेका छन्।
चालु आर्थिक वर्षको फागुन महिनासम्ममा ४७२ जना फरार प्रतिवादीलाई पक्राउ गरिसकेको प्रनाउ अधिकारीले जनाएका छन्। यसले जिल्लामा कानून कार्यान्वयनमा सक्रियता देखिएको छ।
यस्तै, फागुन महिनामा घरेलु हिंसाका ३६ वटा उजुरी दर्ता भएका छन्। तीमध्ये ३१ वटा उजुरी मिलापत्रमा टुंग्याइएको छ भने ५ वटा उजुरी प्रक्रियामा रहेका छन्। घरेलु हिंसाका घटनाहरूमा मुख्यतया घरायसी झैझगडा र मादक पदार्थ सेवनपछिका कुटपिटका घटनाहरू धेरै छन्। यसमा मधेसी समुदायबाट बढी उजुरी परेको छ।
फागुन महिनामा मात्रै २१ जना हराएकोमा १४ जना फेला परेका छन् भने ७ जना अझै बेपत्ता छन्। हराउनेको संख्या बढ्दै गएकाले यसतर्फ पनि प्रहरीको ध्यान आकर्षित भएको छ।
