काठमाडौं । सिरहामा दलित बस्तीमा डोजर चलाइएको घटनाको विरोधमा दलित समुदायले काठमाडौंको बानेश्वरमा प्रदर्शन गरेको छ। ‘दलितका लागि दलित अभियान’ नामक समूहले आयोजित प्रदर्शनमा जातीय विभेद अन्त्य र दलित समुदायका अधिकार सुनिश्चितताको माग गरिएको थियो।
प्रदर्शनकारीहरूले निषेधित क्षेत्र तोड्दै संसद भवनतर्फ अगाडि बढ्ने प्रयास गरेका थिए। यसक्रममा प्रहरीले उनीहरूलाई रोक्न सामान्य बल प्रयोग गरेको बताइएको छ। प्रदर्शनमा सहभागीहरूका अनुसार दलित समुदायमाथिको विभेद अझै पनि जारी छ र राज्यले यो समस्यालाई सम्बोधन नगरेकोप्रति उनीहरूको गुनासो छ।
दलित अभियन्ता खगेन्द्र सुनारले भने, “सिरहामा भएको घटनाले दलित समुदायप्रति राज्यको उदासीनता प्रस्ट देखाउँछ। यो विभेदको अन्त्य गर्न अबको आन्दोलन निर्णायक हुनेछ।”
प्रदर्शनका क्रममा “जातीय विभेद अन्त्य गर”, “दलित अधिकार सुनिश्चित गर” लगायतका नारा लगाइएका थिए। यस घटनामा प्रहरीले केही प्रदर्शनकारीलाई नियन्त्रणमा लिएको भए पनि अवस्था सामान्य रहेको छ।
सिरहामा दलित बस्तीमा डोजर चलाइएको घटनाले दलित समुदायमा व्यापक आक्रोश उत्पन्न गरेको छ। घटनाको निष्पक्ष छानबिन र दोषीमाथि कारबाहीको माग गर्दै विभिन्न दलित संगठनहरूले आगामी दिनमा थप आन्दोलन गर्ने चेतावनी दिएका छन्।
