काठमाडौं, चैत १५ । सरकारविरुद्ध समाजवादी मोर्चाले शुक्रबार राजधानीमा बृहत् जनप्रदर्शन गर्दैछ। एसइई परीक्षा चलिरहेको हुँदा विद्यार्थीलाई असर नपार्ने गरी मोर्चाले जुलुस सुरु गर्ने समय १२ बजेपछि सार्ने निर्णय गरेको छ।
यसअघि ११ बजेबाट जुलुस निकाल्ने तयारी भए पनि परीक्षाका कारण कार्यक्रम व्यवस्थापन सचिवालयले समय परिमार्जन गरेको हो।
समाजवादी मोर्चाले प्रदर्शनलाई व्यवस्थित बनाउन तीन प्रमुख रुट तोकेको छ। यी रुटमार्फत सहभागीहरू प्रदर्शनीमार्ग पुगेर ‘टी’ आकारको सभामा परिणत हुनेछन्।
प्रदर्शनका लागि तीन रुट निर्धारण कोटेश्वर–नयाँ बानेश्वर–माइतीघर–भद्रकाली–भृकुटीमण्डप, दोस्रो रुट – कुपन्डोल–त्रिपुरेश्वर–सुन्धारा–शान्ति बाटिका–भृकुटीमण्डप, सोह्रखुट्टे–लैनचौर–नागपोखरी–पुतलीसडक–भृकुटीमण्डप रहेको छ।
प्रदर्शनपछि रत्नपार्क, भद्रकाली र भृकुटीमण्डप क्षेत्रमा सहभागीहरू रहनेछन ।
शुक्रबार नै राजसंस्थाको पुनःस्थापनाको माग गर्दै राजावादी समूहले पनि काठमाडौंमा प्रदर्शन गर्ने भएका छन्। राजधानीका विभिन्न क्षेत्रमा प्रदर्शन हुने भएकाले सुरक्षा व्यवस्थामा कडाइ गरिने अनुमान गरिएको छ।
