News Portal

  • चितवन बालिका मृत्यु प्रकरण: प्रधानाध्यापकसहित तीन जना पक्राउ

    जनगर्जन संवाददाताफाल्गुन १८,२०८०
    २४२ पटक

    चितवन । चितवनको एक छात्रावासमा बालिकाको मृत्यु भएपछि प्रधानाध्यापकसहित तीन जना पक्राउ परेका छन्।

    गत शनिबार बिहान रत्ननगर नगरपालिका-१५ माधवपुर घर भई वडा १० एकता शिशु निकेतन बोर्डिङ स्कुलको होस्टलमा बस्ने १४ वर्षीया सालिन पोख्रेलको मृत्यु भएको हो। मृत्यु भएपछि ज्यानसम्बन्धी कसुरमा प्रहरीले तीन जनालाई पक्राउ गरेको हो।

    प्रहरीले वडा नम्बर १० कै ६० वर्षीय बालहरि देवकोटा, ४० वर्षका किरणबहादुर अधिकारी र ४८ वर्षीय कमल शर्मा पौडेललाई मंगलबार पक्राउ गरेको थियो। बालहरि उक्त स्कुलका प्रधानाध्यापक, किरणबहादुर सहप्रधानाध्यापक र कमल होस्टेलका वार्डेन हुन्।

    सालिनको मृत्यु भएपछि आफन्तले तीन जनाविरूद्ध किटानी जाहेरी दिएका थिए। उक्त जाहेरीपछि पक्राउ गरेको जिल्ला प्रहरी कार्यालय चितवनका डिएसपी श्रीराम भण्डारीले जानकारी दिए।

    प्रहरीले यस घटनामा अनुसन्धान गरिरहेको हुँदा पोष्टमर्टमको रिपोर्टपछि मात्र घटनाबारे बताउन सक्ने जनाएको छ। शवको पोष्टमर्टमका लागि काठमाडौंस्थित महाराजगञ्ज टिचिङ अस्पतालमा ल्याइएको छ। पोष्टमर्टम पनि भइसकेको डिएसपी भण्डारीले बताए।

    यद्यपि रिपोर्ट आइनसकेकाले प्रहरीको टोली काठमाडौंमै रहेको उनले बताए। ‘पोष्टमर्टम भइसकेको छ तर रिपोर्ट प्राप्त भइनसकेकाले टोली काठमाडौंमै छ,’।

    उनका अनुसार गत शनिबार बालिका होस्टलको कोठामा रहेको सिलिङको पंखामा डोरीमा झुण्डिएको अवस्थामा मृत फेला परेकी थिइन्।

    पक्राउ परेका उनीहरूमाथि अनुसन्धान गर्न सात दिन हिरासतमा राख्न चितवन जिल्ला अदालतले अनुमति समेत दिएको छ।

    प्रतिकृया दिनुहोस्