काठमाडौं । हाल देशभर मनसुनी वायुको प्रभाव सक्रिय रहेको जल तथा मौसम पूर्वानुमान महाशाखाले जनाएको छ। मनसुनको न्यून चापीय रेखा पूर्वमा सरदर स्थानको आसपास र पश्चिममा सरदर स्थानभन्दा केही उत्तरतिर रहेको छ, जसको प्रभावस्वरूप देशभर मौसम बदली हुने देखिएको छ।
महाशाखाका अनुसार आज दिउँसो देशभर सामान्य बदली रहनेछ। देशका सबै प्रदेशका केही स्थानहरूमा मेघगर्जन र चट्याङसहित हल्कादेखि मध्यम वर्षा हुने सम्भावना रहेको छ। कोशी, बागमती, गण्डकी र कर्णाली प्रदेशका एक-दुई स्थानमा भने भारी वर्षा हुने पूर्वानुमान गरिएको छ।
उच्चपहाडी र हिमाली भेगहरूमा हल्कादेखि मध्यम वर्षासँगै हिमपात पनि हुन सक्ने सम्भावना छ, जसले त्यहाँको जनजीवनमा असर पार्न सक्ने देखिएको छ।
रातिको मौसम पनि यस्तै रहने देखिएको छ। कोशी, मधेस, बागमती, गण्डकी, लुम्बिनी र सुदूरपश्चिम प्रदेशका धेरैजसो स्थानमा मेघगर्जन, चट्याङसहितको वर्षा हुन सक्नेछ। विशेष गरी कोशी र गण्डकी प्रदेशका केही स्थानमा भारी वर्षाको सम्भावना औंल्याइएको छ।
मौसमविद्हरूले निरन्तर वर्षा र पहाडी भेगहरूमा सम्भावित पहिरोको जोखिमलाई ध्यानमा राखी आवश्यक सतर्कता अपनाउन नागरिकहरूलाई आग्रह गरेका छन्। साथै, हिमाली क्षेत्रमा यात्रा गर्नेहरूलाई सचेत रहन र आवश्यक पूर्वतयारीका साथ अघि बढ्न सुझाव दिइएको छ।
