काठमाडौं — कवाड व्यवसायी समाज नेपालले काठमाडौं महानगरपालिकाले कवाड व्यवसायीहरूमाथि गरिरहेको ज्यादतीलाई तत्काल रोक्न माग गरेको छ। सोमबार रिपोर्टर्स क्लब नेपालमा पत्रकार सम्मेलन गर्दै कवाड व्यवसायी समाजले आफूहरूमाथि भइरहेको अन्याय र ज्यादती रोकी व्यवसाय गर्न पाउने वातावरण निर्माण गर्न आग्रह गरेको हो।
उनीहरूले महानगरपालिकाले डोजर प्रयोग गरेर व्यवसायस्थलहरूमा तोडफोड गरेको, साईकल र समानहरू जफत गरेको भन्दै गुनासो गरे। व्यवसायीहरूले आफ्ना जिउधनको सुरक्षाका लागि सरोकारवालाहरूको ध्यानाकर्षण गराएका छन्।
कवाड व्यवसायी समाजका अध्यक्ष राम केवल गुप्ताले व्यवसायीहरूमाथि भइरहेको ज्यादतीको विरोधमा भोलि बिहान ११ बजे काठमाडौं महानगरपालिकालाई घेराउ गर्ने घोषणा गरे। उनले डेढ वर्षदेखि आन्दोलन गर्दा पनि महानगर प्रमुख बालेन्द्र शाहले समस्याको समाधान खोज्न चासो नदेखाएको आरोप लगाए।
आम जनता पार्टीका प्रवक्ता चन्द्रभुषण साहले काठमाडौं महानगरले शक्ति केन्द्र र सिण्डिकेटधारी व्यवसायीहरूको आडमा सर्वसाधारणको पेशा खोस्ने काम गरिरहेको आरोप लगाए। उनले कवाड व्यवसायीहरूले आफ्नो सुरक्षाका लागि संघर्षको तयारी गरेको चेतावनी पनि दिए।
संघर्ष समितिका नेता ओमप्रकाश सिंह, जोगेन्द्र साह, मनोहर जैसवाल, सुरेश साह, सरोज श्रेष्ठ, गोपाल जैसवाल, उपेन्द्र साह, रविशंकर जैसवाल, कृष्ण यादव, श्याम यादव र आर्या पाण्डेलगायतको उपस्थिति रहेको पत्रकार सम्मेलनमा महानगरको दमन र ज्यादतीको निन्दा गरिएको थियो।
कवाड व्यवसायीहरूले महानगरको ज्यादती जारी रहे थप संघर्षका कदमहरू चाल्ने चेतावनी दिएका छन्।
