काठमाडौं, १५ वैशाख । जारी शिक्षक आन्दोलनमा समर्थन जनाउन पुगेको नेकपा (एकीकृत समाजवादी)को शीर्ष टोली आन्दोलनरत शिक्षकहरूबाट अपमानित भएर फर्किएको छ।
पार्टी अध्यक्ष तथा पूर्वप्रधानमन्त्री माधवकुमार नेपाल, वरिष्ठ नेता झलनाथ खनालसहितको टोली आइतवार आन्दोलनरत शिक्षकहरूलाई ऐक्यबद्धता जनाउन गएका थिए। तर, उनीहरू पुगेपछि आन्दोलनरत शिक्षकहरूले उल्टै उनीहरूमाथि तीव्र नाराबाजी गरे। नेताहरूका विरुद्ध “पार्टीका कारण शिक्षा नास भयो”, “पुराना नेता मुर्दावाद” जस्ता नाराहरू घन्किएपछि वातावरण तनावपूर्ण बनेको थियो।
शिक्षकहरूलाई सम्बोधन गर्ने तयारीमा रहेका नेताहरू नाराबाजीका बीच अप्ठ्यारो महसुस गर्दै कार्यक्रम स्थलबाट फर्किएका थिए। स्रोतहरूका अनुसार, आन्दोलनरत शिक्षकहरूले पुराना नेताहरूलाई शिक्षा प्रणालीको बर्बादीका जिम्मेवार ठहराउँदै उनीहरूको समर्थन अस्वीकार गरेका थिए।
अहिलेको आन्दोलन शिक्षा, विज्ञान तथा प्रविधि मन्त्रालयले ल्याएको ‘शिक्षक समायोजन सम्बन्धी विधेयक’को विरोधमा जारी छ। आन्दोलनरत शिक्षकहरूले सरकारले विधेयक फिर्ता नगरेसम्म आन्दोलन जारी राख्ने चेतावनी दिएका छन्। उनीहरू कुनै पनि राजनीतिक दलबाट प्रभावित नभई आफ्ना अधिकार र असन्तुष्टिको आवाज उठाइरहेका छन्।
यस घटनाले शिक्षकमाझ राजनीतिक दलहरूप्रति गहिरो आक्रोश रहेको प्रस्ट पारेको छ। साथै, दलहरूका पुराना नेताहरूले जनसमुदायको विश्वास गुमाइरहेको तीतो यथार्थ पनि उजागर भएको छ।
