काठमाडौं — १३औं दक्षिण एसियाली खेलकुद (साग) का स्वर्ण विजेता कराते खेलाडी विप्लवलाल श्रेष्ठले बुधबार संन्यास घोषणा गरेका छन्। उनले नेपाल कराते महासंघको विभेदपूर्ण व्यवहारका कारण खेल जीवन अन्त्य गर्न बाध्य भएको बताएका छन्।
पत्रकार सम्मेलनमार्फत संन्यास घोषणा गर्दै उनले भने, “मलाई छोड्न मन भएर कराते त्याग्न लागेको होइन। यो मेरो मनपर्ने खेल हो, जसमा वर्षौं मिहिनेत गरेको छु। तर, बाध्य भएर छोड्दै छु। कराते महासंघ नेतृत्व (युवराज लामा) बाट जुन विभेद भयो, त्यो सहन सकिनँ।”
विप्लवले गत वर्ष हाङचाउ एसियाली खेलकुदमा पदक जित्न नजिक पुगेका थिए। उनले एसियाड खेलेपछि अर्को एसियाडका लागि आफूलाई योग्य महसुस गरेका थिए। तर, भुटानमा भएको आठौं दक्षिण एसियाली कराते च्याम्पियनसिपमा स्वर्ण पदक जित्दा पनि उनलाई मिसन २०२६ को तयारी क्याम्पमा समावेश नगरेको प्रति असन्तुष्टि व्यक्त गरे।
उनले भने, “मेरो क्षमता हुँदाहुँदै पनि अन्तर्राष्ट्रिय प्रतियोगिताहरूबाट वञ्चित गराइयो। भुटानमा स्वर्ण जितेका खेलाडीलाई क्याम्पमा राख्ने भनिएको थियो, तर मलाई समावेश गरिएन। कराते नेतृत्वको थिचोमिचोका कारण निराश भएर संन्यास लिने अवस्थामा पुगेँ।”
विप्लवले महासंघभित्र अन्य खेलाडीहरूले पनि विभेद सहनुपरेको खुलासा गरे। उनले भने, “धेरै खेलाडीले आफ्नो मर्का भन्न सक्दैनन्। भित्रभित्रै पिल्सिएर बसेका छन्। तर, मैले अन्याय सहन सकिनँ र त्यसविरुद्ध आवाज उठाएको छु। यो मेरो मात्र होइन, सबै कराते खेलाडीको आवाज हो।”
विप्लवले कराते महासंघले आफूलाई प्रशिक्षक दीपक श्रेष्ठसँगको निकट सम्बन्धका कारण बेवास्ता गरेको आरोप लगाए। महासंघसँग सम्बन्ध चिसिएको कारण दुई पटकका साग स्वर्णधारी तथा एनएनआईपीएका अध्यक्ष दीपक श्रेष्ठ महासंघको समर्थनमा नरहेको बताए ।
हाङचाउ एसियाडका लागि कराते छनोट प्रतियोगितामा विवाद हुँदा दीपक श्रेष्ठले अर्का प्रशिक्षकमाथि हातपात गरेका थिए, जसका कारण उनी महासंघबाट निलम्बनमा परेका थिए। यस घटनापछि महासंघले विप्लवलाई पनि विभेद गर्न थालेको उनले आरोप लगाए।
नेपाल कराते महासंघले भने विप्लवका आरोपहरूबारे अहिलेसम्म कुनै औपचारिक प्रतिक्रिया दिएको छैन।
