काठमाडौं । बंगलादेशमा जारी रहेको आरक्षण कोटा विरोधी आन्दोलनमा प्रभावित भएका नेपाल बाट अध्ययनका लागि बङ्गलादेश गएका नेपाली विद्यार्थी काठमाडौं फर्किन थालेका छन् ।
आन्दोलन पछि असुरक्षित महसुस गरेका नेपालि केही विद्यार्थीहरु आजैमात्र काठमाडौं विमानस्थलमा अवतरण गरेका छन् । बङ्गलादेशको सवार क्षेत्रको इनाम मेडिकल कलेजमा पढ्ने केही नेपाली विद्यार्थीहरू आज स्वदेश फर्किएका हुन् । केही दिन अघिदेखि नै स्थलमार्गबाट पनि नेपालीहरु स्वदेश फर्किने क्रम बढेको थियो ।
जिल्ला प्रशासन कार्यालय झापाका अनुसार विगतमा स्थलमार्गबाट ८–१० जना आउजाउ हुने गरे पनि केही दिनयता बंगलादेशबाट स्वदेश फर्किनेहरुको संख्या ह्वात्तै बढेको छ । कार्यालयका अनुसार साउन ३ गते ६५ जना र ४ गते २५ जना नेपाली बंगलादेशबाट फर्किएको रेकर्ड छ ।
झापाको काकरभिट्टाबाट भारतीय भूमिमा प्रवेश गरी नेपालीहरू स्थलमार्ग हुँदै बंगलादेश आउजाउ गर्दछन् । यसअघि भारतका सञ्चारमाध्यमहरूले केही नेपाली विद्यार्थीहरू भारतको मेघालय हुँदै स्वदेश फर्किरहेको उल्लेख गरेका थिए ।
सरकारले नेपाल फर्कन चाहने अन्य विद्यार्थीको सहजीकरणका लागि परराष्ट्र मन्त्रालयले अनलाइन फारम भर्न सूचना जारी गरिसकेको बताएको छ ।
बंगलादेशमा कति जना नेपाली विद्यार्थी छन् भन्ने एकिन नभए पनि सबै सुरक्षित रहेको ढाकास्थित नेपाली दूतावासले जनाएको छ ।
दूतावासले विज्ञप्ति जारी गर्दै अत्यावश्यकवाहेक बाहिर ननिस्किने विद्यार्थीलाई सूचित गरेको छ । आवश्यक सहयोगका लागि दूतावासमा सम्पर्क गर्न भनेको छ ।
सरकारी सेवा प्रवेशमा निर्धारित आरक्षणको विरोधमा भएको आन्दोलन भड्किएपछि केही दिनदेखि बंगलादेश अशान्त छ । देशभर कर्फ्यु आदेश जारी भए पनि ठाउँठाउँमा झडप भइरहेको छ ।
आन्दोलनको चपेटामा परेको बंगलादेशबाट शनिवारसम्म करिब ८ सय नेपाली विद्यार्थी नेपाल प्रस्थान गरेका छन् । हवाई तथा भूमार्ग भएर ती विद्यार्थीहरूले बंगलादेश छोडेको परराष्ट्र मन्त्रालयले जनाएको छ ।
