काठमाडौ । राजावादी प्रदर्शन हिंसात्मक बनेपछि सिंहदरबारस्थित गृहमन्त्रालयमा सुरक्षा निकायका प्रमुखहरूको आकस्मिक उच्चस्तरीय बैठक बसेको छ। तीनकुने क्षेत्रमा भएको प्रदर्शनले उग्र रूप लिएपछि उत्पन्न सुरक्षा स्थितिको समीक्षा गर्न गृहमन्त्री रमेश लेखकको अध्यक्षतामा बैठक सुरु भएको हो।
बैठकमा नेपाल प्रहरी, सशस्त्र प्रहरी बल, राष्ट्रिय अनुसन्धान विभागका प्रमुखहरू तथा गृहमन्त्रालयका उच्च अधिकारीहरू सहभागी छन्। स्रोतका अनुसार बैठकमा पछिल्लो अवस्थाको समिक्षा गर्दै सुरक्षा रणनीति बनाउने विषयमा छलफल भइरहेको छ।
गृहमन्त्री लेखकले सुरक्षाकर्मीहरूले संयमता अपनाएकै कारण ठूलो क्षति हुन नपाएको बताएका छन्। उनले प्रदर्शनकारीहरूको आक्रमणबाट केही प्रहरी घाइते भएको उल्लेख गर्दै, संयोजक दुर्गा प्रसाईंले प्रहरीलाई मार्ने उद्देश्यले गाडी चलाएको आरोपसमेत लगाएका छन्।
सुरक्षा रणनीतिबारे छलफल गर्न आयोजित यस बैठकमा, गृहमन्त्री लेखकले अबको कदमबारे सुरक्षा प्रमुखहरूलाई निर्देशन दिने तयारी गरेका छन्। प्रशासनले शान्ति सुव्यवस्था कायम राख्न आवश्यक सबै कदम चाल्ने बताएको छ।
बैठकपछि थप सुरक्षा उपायहरू घोषणा हुनसक्ने संकेत गृहमन्त्रालय स्रोतले दिएको छ।
