काठमाडौं । काठमाडौं महानगरपालिकाका मेयर बालेन शाहले हालको सरकारप्रति कडा असन्तुष्टि जनाउँदै भ्रष्टाचार र सुशासनको विषयमा कटाक्ष गरेका छन्। सामाजिक सञ्जालमार्फत आफ्नो धारणा राख्दै उनले भ्रष्टाचार गर्नेहरूलाई जोगाउने सरकारको व्यवहारलाई प्रहार गरेका हुन्।
बालेनले लेखेका छन्, “यति धेरै कानुन मिच्ने भ्रष्टाचारिलाई बचाउने सरकार अनि हामी सुशासनको कुरा चाहिँ भाषणमा सुन्नुपर्ने। माथिको कुरा गलत भए मलाई जेल हाल।”
उनको यो टिप्पणी पछिल्लो समय सरकारी निकायहरूमा बढ्दै गएको भ्रष्टाचार र दण्डहीनताको विषयलाई इंगित गरेको विश्लेषण गरिएको छ। बालेनको यो अभिव्यक्ति सामाजिक सञ्जालमा व्यापक रूपमा चर्चामा रहेको छ। धेरैले उनको भनाइलाई समर्थन गर्दै सरकारको जवाफदेहिता र पारदर्शितामा प्रश्न उठाएका छन्।
बालेनको यो स्पष्ट र आक्रामक धारणा उनको साहसी र निर्भीक व्यक्तित्वको रुपमा लिइएको छ। यसअघि पनि उनले विभिन्न विवादास्पद विषयमा स्पष्ट अभिव्यक्ति दिएर चर्चा बटुलेका थिए । बालेनको यो टिप्पणीले सरकारले सुशासन र भ्रष्टाचार नियन्त्रणमा देखाएको उदासिनताप्रति थप बहस सिर्जना गरेको छ।
