काठमाडौँ । नेपाल कम्युनिस्ट पार्टीका महासचिव विप्लव सीले तीनकुने घटनाका अपराधिलाई कडा कारवाही गर्न माग गरेका छन्। शनिबार एक विज्ञप्ति जारी गर्दै उनले विरोध सभा आयोजना गर्ने बहानामा भिड जम्मा पारेर विध्वंस मच्चाउनेलाई कडा कारवाही गर्नुपर्ने बताएका छन्।
शुक्रबार आफू नेतृत्वको समाजवादी मोर्चाले आयोजना गरेको विशाल जनसभामा सहभागी जनसमुदायलाई धन्यवाद दिंदै विप्लवले राजावादी—प्रतिगमनकारी तत्वहरूले तीनकुनेमा गरेको अराजक गतिविधिको घोर भर्त्सना गरेका छन्। उनले भने, ‘राजावादी—प्रतिगमनकारी तत्वहरूले विरोध सभा आयोजना गर्ने नाममा भिड जम्मा पारेर विध्वंस मच्चाउने कार्य गरे। यस क्रममा नेकपा (एकीकृत समाजवाद) को केन्द्रीय कार्यलय, जिल्ला कार्यालय, नेकपा एसका अध्यक्ष तथा पूर्वप्रधानमन्त्री माधवकुमार नेपालको निवास, भाटभटेनी सुपरमार्केट, कान्तिपुर र अन्नपूर्ण पत्रिका कार्यालय तथा विभिन्न निजी घरहरूमा तोडफोड र आगजनीको कार्य भएको छ, जुन अत्यन्त निन्दनीय छ।’
विप्लवले उक्त घटनामा संलग्न अपराधीहरूमाथि कडा कारवाहीको माग गर्दै सुरक्षा निकायको भूमिकामाथि प्रश्न उठाएका छन्। ‘घटनाबारे जानकारी गराउँदा पनि लामो समय प्रहरी प्रशासन नपुग्नुको पछाडि के कारण थियो भन्ने विषयमा राज्यका सम्बन्धित निकायहरूले तत्काल जाँचबुझ गर्नुपर्छ,’ विज्ञप्तिमा उल्लेख छ।
देशमा राजनीतिक अस्थिरता, आर्थिक संकट, भ्रष्टाचार, सांस्कृतिक विचलन, तथा विदेशी हस्तक्षेप चरम सीमामा पुगेको उल्लेख गर्दै उनले यस्तो अवस्थामा प्रतिगमनकारी हर्कतले मौकापाएको बताए। उनले भने, ‘यसको निकास प्रतिगमन हुन सक्दैन। यथास्थितिमा गोलचक्कर लगाइरहने दलाल पुँजीवादी प्रवृत्ति र संसदीय व्यवस्थाबाट पनि समाधान सम्भव छैन। यसका लागि नेपाली विशेषताको समाजवाद वा वैज्ञानिक समाजवादी व्यवस्थाको स्थापना अपरिहार्य छ।’
विप्लवले परिवर्तनप्रेमी नेपाली जनतालाई प्रतिगमनकारी र यथास्थितिवादी दलाल पुँजीवादी प्रवृत्तिहरूविरुद्ध संघर्ष गर्दै समाजवादतर्फ अघि बढ्न विशेष अपिल गरेका छन्।
शुक्रबार समाजवादी मोर्चाले भृकुटीमण्डपको सडकमा विशाल सभाको आयोजना गरेको थियो, जुन शान्तिपूर्ण र सानदार रूपमा सम्पन्न भएको विप्लवले बताए। अर्कोतर्फ, राजावादीहरू तीनकुनेमा सभा गर्ने योजनामा रहे पनि अराजक गतिविधि मच्चाएपछि त्यहाँ झडप भएको थियो। उक्त झडपमा परी एक पत्रकारसहित दुई जनाको ज्यान गएको थियो भने ११० जना घाइते भएका थिए।
नेतृत्वविहीन राजावादी आन्दोलनका कारण ठूलो धनजनको क्षति भएको विप्लवले बताए।
