काठमाडौं, चैत्र १४ । समाजवादी दलित मोर्चा नेपालले समाजवादी मोर्चा नेपालद्वारा यही चैत्र १५ गते आयोजना गरिने जनप्रदर्शनमा सहभागिता जनाउन आम दलित समुदाय तथा उत्पीडित वर्गका नागरिकलाई अपिल गरेको छ।
समाजवादी दलित मोर्चाले आज एक प्रेस विज्ञप्ति जारी गर्दै विश्व भूराजनीति र देशको तरल राजनीतिक अवस्थामा जनताको निराशा एवम् आक्रोशलाई दुरुपयोग गरी २४० वर्ष शासन गरी इतिहासमा असफलसिद्ध भएको सामन्ती राजतन्त्रलाई अहिले पुनस्थापना गर्ने भ्रमपूर्ण प्रचार र गतिविधि गरिंदैछ । नेपाली जनताको लामो संघर्षबाट प्राप्त संघीय लोकतान्त्रिक गणतन्त्र, धर्मनिरपेक्षता, समानुपातिक-समावेशी लगायतका वर्तमान संविधानमा भएका व्यवस्थालाई समाप्त पारी इतिहासको पाङ्ग्रालाई पछाडि फर्काउने र सामन्ती व्यवस्था कायम गरी जनतालाई अधिकारविहीन, रैती र दास बनाउने प्रतिगमनकारीहरुको यो हर्कत कुनैपनि मूल्यमा स्वीकार्य हुन सक्दैन । पक्कै पनि अहिलेको व्यवस्थामा केही अपुगहरु छन् र केही यथास्थितिवादी पार्टी र नेतृत्वको असक्षमताका कारण यसमा थप समस्या देखा परेका छन् । राज्य र सरकारको तर्फबाट देश र जनताको पक्षमा जिम्मेवारपूर्ण काम हुन नसक्दा आज जनता चरम निराशा र वितृष्णामा छन् । राष्ट्रिय स्वाधीनताको रक्षा, सुशासन र जनजीविकाको कोणबाट हेर्दा पनि अवस्था भयावह रहेको छ । यस्तै दलित समुदाय माथिको उत्पीडन र शोषण पनि कम हुने भन्दा बढ्दो क्रममा रहेको छ । आम नेपाली जनताको चाहना अहिले व्यवस्थामा रहेको राम्रो कुराको रक्षा गर्दै अपुग विषय थप गर्ने हो न कि पछाडि फर्किने । जनताले अग्रगमन चाहेका छन् र त्यो भनेको समाजवाद हो र त्यसले मात्र देशको संकट समाधान गरी देश र जनतालाई सहि दिशा दिन सक्दछ ।
यस परिस्थितिमा आम नेपाली जनतालाई सूसुचित गर्ने उद्देश्यले भ्रष्टाचार, प्रतिगमन र यथास्थितिको विरुद्ध सुशासन, गणतन्त्र र समाजवादको पक्षमा समाजवादी मोर्चा नेपालद्वारा चैत्र १५ गते आयोजित जनप्रदर्शनमा हाम्रो ऐक्यबद्धता र आम जनताको सहभागिताको लागि आम दलित समुदाय, किसान, मजदुर, युवा, महिला, उत्पीडित जाति, जनजाति, मधेसी, मुस्लिम, मध्यमवर्ग, राष्ट्रवादी शक्ति लगायत सम्पूर्ण न्यायप्रेमी नागरिकलाई व्यापक रूपमा सहभागी हुन आग्रह गरेको छ।
विज्ञप्तिमा समाजवादी दलित मोर्चाका संयोजक रामलाल सी तथा विभिन्न सम्बद्ध संगठनका अध्यक्षहरू दलजीत श्रीपाली (नेपाल दलित मुक्ति मोर्चा), राम अवतार पासवान (नेपाल दलित मुक्ति संगठन), रामलाल सी (श्रमिक समुदाय मोर्चा नेपाल), र शिव वर्मा (समाजवादी दलित मुक्ति मोर्चा) लगायतका नेताहरूको हस्ताक्षर रहेको छ।
समाजवाद र सुशासनको पक्षमा एकताबद्ध हुँदै भ्रष्टाचार, प्रतिगमन र अन्यायको विरुद्ध आवाज उठाउन सम्पूर्ण नागरिकलाई मोर्चाले पुनः आह्वान गरेको छ।
