दाङ । दाङको घोराही उपमहानगरपालिका-१० की २६ वर्षीय शिला चौधरीमाथि घोराही-११ चागुका गोपाल चौधरीकी श्रीमतीले अमानवीय रूपमा कुटपिट गरेको घटना सार्वजनिक भएको छ।
घटनाका अनुसार गोपाल चौधरीले शिलालाई साँझ आफ्नो घरमा बोलाएका थिए। त्यहाँ उनको श्रीमतीसहित अन्य व्यक्तिहरूले शिलामाथि घरभित्रै कुटपिट गरी लछारपछार पारे। त्यसपछि उनलाई बाहिर ल्याएर बिजुलीको पोलमा डोरीले बाँधेर पुनः निर्घात कुटपिट गरिएको आरोप छ।
घटनापछि पीडित र पीडक पक्षबीच कागजी मिलापत्र गराइएको थियो। तर, घटनाको गम्भीरता हेर्दै अधिकारकर्मीहरूको पहलमा प्रहरीले उजुरी दर्ता गरेको छ। अधिकारकर्मी खुमा खड्काका अनुसार महिलामाथि गरिएको यो दुर्व्यवहार अत्यन्तै निन्दनीय छ, र पीडितलाई न्याय दिन कानुनी प्रक्रिया अघि बढाइएको छ।
हाल प्रहरी कार्यालयमा ‘अभद्र व्यवहार’ अन्तर्गत मुद्दा दर्ता भइसकेको छ। पीडित पक्षले दोषीलाई कडा कारबाहीको माग गरेका छन्। घटनाले महिलाहरूको सुरक्षाप्रति गम्भीर प्रश्न खडा गरेको भन्दै सामाजिक अभियन्ताहरूले दोषीलाई हदैसम्मको कारबाही गर्नुपर्ने आवाज उठाएका छन्।
