काठमाडौँ । नेपाल कम्युनिस्ट पार्टी (नेकपा) को पोलिटब्युरो बैठक सोमबार सम्पन्न भएको छ। महासचिव विप्लव सीको अध्यक्षतामा बसेको बैठकले आगामी निर्वाचन, वर्तमान राजनीतिक अवस्था, तथा संघर्षसम्बन्धी महत्त्वपूर्ण निर्णयहरू गरेको छ।
बैठकले किरण, आहुति, कञ्चन, मोहन विक्रम लगायतका नेताहरूले नेतृत्व गरेका पार्टीहरूसँग सहकार्य गर्ने, समाजवादी मोर्चालाई प्रभावकारी बनाउने तथा पार्टी एकताको प्रयासलाई निरन्तरता दिने निर्णय गरेको छ।
बैठकमा महासचिव विप्लवले प्रस्तुत गरेका १० प्रस्तावमाथि छलफल भएको थियो। महासचिव विप्लवका अनुसार नेपाली विशेषताको समाजवाद निर्माणका लागि स्वतन्त्र तथा संयुक्त पहललाई तीव्र पार्ने निर्णय गरिएको छ।
नेकपा स्थायी समिति सदस्य तथा प्रचार विभाग इन्चार्ज अनिल सीका अनुसार बैठकले पार्टीको जनाधार बढ्दै गएको निष्कर्ष निकालेको छ। साथै, बैठकले केन्द्रीय समितिको राजनीतिक दिशाको प्रक्षेपण सही रहेको पुष्टि गरेको छ।
