काठमाडौं । श्रमिक समुदाय मोर्चा नेपाल, बागमती प्रदेश समन्वय समितिको दोस्रो पूर्ण बैठक काठमाडौंमा सम्पन्न भएको छ। बैठक बुद्धनगरस्थित कार्यालयमा आयोजना गरिएको थियो।
बैठकले पार्टीको वैचारिक संश्लेषणलाई अवलम्बन गर्ने, गणतन्त्रवादी तथा गणतन्त्रवादी मित्र शक्तिहरूसँग सहकार्य गर्ने, नेपाली विशेषताको समाजवाद र श्रमिक समुदायका सवालमा गहन अन्तरक्रिया गर्ने महत्वपूर्ण निर्णय गरेको छ। साथै, संगठनको कार्यलाई तीव्रता दिने, विभेदका घटनाहरूमा सशक्त संघर्ष गर्ने तथा स्थानीयदेखि संघीय सरकारसम्म श्रमिक समुदायका अधिकारका लागि आवाज उठाउने निर्णय पनि बैठकले गरेको छ।
बैठकका प्रमुख अतिथि नेपाल कम्युनिस्ट पार्टीका केन्द्रीय सदस्य तथा मोर्चाका केन्द्रीय अध्यक्ष रामलाल सीले उत्पीडित जाति तथा समुदायको मुक्तिका लागि संघर्षको विकल्प नरहेको बताउनुभयो। उहाँले नेपाली विशेषताको समाजवाद स्थापनाका लागि आम जनता र देशको मुक्तिमा ध्यान दिनुपर्नेमा जोड दिनुभयो। साथै, नेकपा र संयुक्त मोर्चाले नयाँ निकास दिन गम्भीर रूपमा सोचिरहेको कुरा उहाँले स्पष्ट पार्नुभयो।
त्यसैगरी, नेकपाका केन्द्रीय सदस्य तथा मोर्चाका केन्द्रीय सचिव उमेश सीले श्रमिक समुदायले नेतृत्व विकास गर्न सक्रियताका साथ संघर्ष गर्नुपर्ने आवश्यकता औंल्याउनुभयो। मोर्चाका बागमती प्रदेश इन्चार्ज पदम सीको अध्यक्षतामा सम्पन्न यस बैठकले श्रमिक समुदायका हकहितका लागि ठोस निर्णयहरू गर्दै संगठनलाई थप सशक्त बनाउने प्रतिबद्धता व्यक्त गरेको छ।
