काठमाडौं । नेपाल विद्युत प्राधिकरणका निवर्तमान कार्यकारी निर्देशक कुलमान घिसिङबारे माओवादी केन्द्र र अध्यक्ष पुष्पकमल दाहाल ‘प्रचण्ड’ ले भ्रम छरेको भन्दै प्रधानमन्त्री केपी शर्मा ओलीले कडा प्रतिक्रिया दिएका छन्।
मंगलबार सुजाता कोइरालाद्वारा लिखित आत्मकथा ‘म र सानोबुबा’ विमोचन समारोहलाई सम्बोधन गर्दै प्रधानमन्त्री ओलीले कुलमानलाई महाकवि लक्ष्मीप्रसाद देवकोटाको महाकाव्य ‘प्रमिथश’ को पात्रझैं व्याख्या गर्न खोजिएको बताए।
‘प्रमिथशले आगो चोरेर पृथ्वीमा ल्याएपछि उनलाई हजारौं वर्ष ढुंगाको चेपमा कैद गरियो। त्यसैगरी कुलमान घिसिङलाई पनि चमत्कारी नेता झैं चित्रण गर्न खोजिएको छ। तर के उहाँ नियुक्त हुनेबित्तिकै बिजुली बोकेर आउनुभएको थियो? वर्षौंदेखि निरन्तर गरिएको कामलाई जादू वा चमत्कारका रूपमा व्याख्या गर्ने भ्रममा नपर्न म सबैलाई आग्रह गर्न चाहन्छु,’ प्रधानमन्त्री ओलीले भने।
उनको यो टिप्पणी माओवादी केन्द्रका अध्यक्ष प्रचण्डको पछिल्लो अभिव्यक्तिलाई लक्षित थियो। सोमबार बसेको मन्त्रिपरिषद् बैठकले घिसिङलाई विद्युत प्राधिकरणको कार्यकारी निर्देशकबाट हटाउने निर्णय गरेको थियो, जसको चौतर्फी आलोचना भइरहेको छ।
प्रचण्डले सरकारको निर्णयप्रति खेद व्यक्त गर्दै कुलमानको पुनर्नियुक्तिको माग गरेका थिए। त्यसप्रति कटाक्ष गर्दै प्रधानमन्त्री ओलीले हाल कार्यकारी निर्देशक नियुक्त भएका हितेन्द्रदेव शाक्यलाई नै प्रचण्ड प्रधानमन्त्री हुँदा निकम्मा बनाएको आरोप लगाए।
सरकारको यो निर्णयबारे सर्वसाधारणदेखि ऊर्जा क्षेत्रका विज्ञसम्मले विभिन्न प्रतिक्रिया जनाइरहेका छन्।
