News Portal

  • खै मेरो लोकतन्त्र ?

    जनगर्जन संवाददाता२०८१ आषाढ ४
    ८२ पटक

    जनयुद्ध घोषणा भो
    विद्रोह सशस्त्रको
    जनता लामबद्ध भो
    प्रतिकार दमनको ।

    जनपक्षिय अगुवाहरु
    जनताका प्रतिनिधिहरु
    समातिन्थे नै दिनहुँ
    अचम्म थिएन मारिनु ।

    बेपत्ता र घाइतेको
    गणना नै कहाँ थियो
    उठिबास कति हुन्थ्यो
    त्याग्नै घरबास पथ्र्यो ।

    लक्का जवान बाइसको
    बाइसै पुग्यो बिछोडको
    अँधेरी थियो बिहानको
    असार तीन एकासीको ।

    उडी आयो चिलसरी
    राज्यको क्रुर सिपाही
    टिपि गयो चल्ला लिई
    काख आमाको रित्याई ।

    पत्तो आजसम्म छैन
    सूचना सुइको छैन
    छ कहाँ बोलिदैन
    देखाउन मानिदैन ।

    रक्षा दायित्व उसको
    किन भक्षक आफै बन्यो
    प्रश्न छ राज्यलाई मेरो
    मेरो सन्तान कहाँ गयो ?

    बिराम के उसको थियो
    हरण किन पो गर्यो
    भन लुकाइ कहाँ राख्यौ
    भन गोप्यमा किन पार्यौ ?

    राखेको तिम्ले नै हो
    तिम्ले नै लुकाएको
    बचाएनि तिमीले हो
    मारे जिम्मा नि तिम्रो ?

    बन्दी बनाई राखेकै छौ
    खाना पेटभरी दिन्छौ
    लुगा नि के दिने गर्छौ
    कि नागैं राखेका छौ?

    कि लडाएका छौ बाँधि
    हलचल नहुने गरी
    आखामा कालो पट्टी
    कानमा ठेडी कोची ।

    भएको जे त्यो भन
    गरिएको के त्यो भन
    राखेको कहाँ हो भन
    छोडेको फेहरिस्त भन ।

    भन राख्यौ कि जलमा
    देखाउ छ कि थलमा
    कि टंच्याइ राख्यौ नभमा
    न ढाटी सत्य भनन ।

    लिएको काखबाटै थुति
    देख्ने आकाश साक्षि
    पृथ्वी प्रत्यक्षदर्शी
    रोक्न खोज्ने वर्षेझरी ।

    आँखाको लाल हाम्रो
    संसारमै हाम्रो राम्रो
    कठैबरा चिचिलो त्यो
    निरीह बेसहारा त्यो ।

    ऐय्या आमै नि पुकार्यो
    पुकार ब्यर्थै भयो
    गुहार हे चिच्यायो
    को त्यहाँ गुहार दिन्थ्यो ?

    थिए पाल्तु राज्यका
    हाम्रै नुनले मात्तिएका
    बोलि भाषा बन्दुकका
    धाक धक्कु सत्ताका ।

    सन्तानको सुइको छैन
    मुटु चल्छ कि चल्दैन
    आफ्नै धडकन याद भएन
    आफ्नै खुनको हक रहेन ।

    कस्तो कानून सत्ताको
    कस्तो न्याय शासकको
    के विवेक राज्यको
    के धर्म हो जगतको ?

    छ के भनु स्वतन्त्रता
    पिरले बाँधिएकी म त
    भनु भने गणतन्त्र
    खै मेरो लोकतन्त्र ? 

    प्रतिकृया दिनुहोस्