काठमाडौ । राजसंस्थाको समर्थनमा शुक्रबार काठमाडौंमा भएको प्रदर्शन हिंसात्मक बनेपछि सरकारले स्थिति सम्हाल्न मन्त्रिपरिषद् बैठक बोलाएको छ। प्रधानमन्त्री निवास बालुवाटारमा जारी बैठकमा सरकारले हिंसात्मक घटनाको समीक्षासहित अगाडि चाल्न सक्ने कदमबारे छलफल गरिरहेको छ।
गृह मन्त्रालयका अनुसार पूर्वराजा ज्ञानेन्द्र शाहको समर्थनमा आयोजित प्रदर्शनका क्रममा कैयौँ निजी तथा सरकारी सम्पत्तिमा तोडफोड, लुटपाट तथा आगजनी भएका छन्। प्रदर्शनकारी र सुरक्षाकर्मीबीचको झडपले उग्ररूप लिँदा एक जना प्रदर्शनकारी र एक जना टेलिभिजन पत्रकारको मृत्यु भएको छ।
समाचार संकलन गरिरहेका टेलिभिजनकर्मी रहेको घरमा प्रदर्शनकारीले आगजनी गरेको प्रहरीले जनाएको छ। घटनामा संलग्न दोषी पहिचान गर्ने र उनीहरूमाथि कारबाही अघि बढाउने तयारी सरकारले गरिरहेको छ।
गृह मन्त्रालयका अधिकारीहरूले शुक्रबार साँझ सरकार संयमित भएर नबस्ने चेतावनी दिएका थिए। हाल सरकारले सुरक्षा व्यवस्थालाई थप कडा बनाउने तथा आगामी दिनमा यस्ता घटनालाई रोक्नका लागि आवश्यक कदम चाल्ने संकेत गरेको छ।
