काठमाडौं । नेकपा (माओवादी केन्द्र) की उपाध्यक्ष पम्फा भुसालले पूर्वराजा ज्ञानेन्द्र शाहलाई यदि राजनीति गर्ने चाहना छ भने दल खोलेर वा कुनै दलमा सहभागी भएर प्रत्यक्ष प्रतिस्पर्धाबाट आउन चुनौती दिएकी छन्।
शुक्रबार समाजवादी मोर्चाले आयोजना गरेको जनसभामा बोल्दै भुसालले पूर्वराजालाई राजावादी दलको नेतृत्व लिन सुझाव दिँदै जनतासामु प्रतिस्पर्धा गर्न आग्रह गरिन्। उनले ज्ञानेन्द्र शाहले चुनाव जितेर आए कार्यकारी राष्ट्रपति वा प्रधानमन्त्री बन्न सक्ने बताइन्।
“नागरिक भएर आउ, दल खोल, राप्रपा वा कुनै राजावादी दलको अध्यक्ष भएर जनताको माझमा जाऊ। हामी चुनौती दिन्छौं, यदि दुई-तिहाइ ल्यायौ भने कार्यकारी राष्ट्रपति वा प्रधानमन्त्री बन, हामी स्वीकार गर्छौं,” उनले भनिन्।
त्यस्तै, भुसालले गणतन्त्रविरोधी आवाज उठ्नुमा सरकार नै दोषी रहेको टिप्पणी गरिन्। उनले मन्त्रालयहरूमा माफियाको प्रभाव रहेको र मन्त्रीहरू नीति निर्माणभन्दा प्रशासनिक हस्तक्षेपमा केन्द्रित भएको आरोप लगाइन्। साथै, उनले १० हजार सहिदको बलिदानको मूल्य बुझ्न सरकारलाई सचेत गराइन्।
