कपिलवस्तु । कपिलवस्तुको विजयनगर गाउँपालिका-३ मायनारीकी सुकुना खटिकमाथि भएको कुटपिट प्रकरणमा संलग्न नन्दलाल कुर्मीलाई प्रहरीले पक्राउ गरेको छ।
चैत २ गते सामान्य विवादको क्रममा कुर्मी र उनका परिवारले खटिकमाथि आक्रमण गरेका थिए । पीडित पक्ष र अधिकारकर्मीहरुको चर्को आलोचना पछि इलाका प्रहरी कार्यालय गणेशपुरले चैत ७ गते कुर्मीलाई नियन्त्रणमा लिएर अनुसन्धान थालेको थियो।
अदालतबाट पहिलो चरणमा ५ दिनको म्याद थप गरेर अनुसन्धान अघि बढाइएको थियो भने थप अनुसन्धानका लागि पुनः ७ दिनको म्याद थप गरिएको छ।
घटनाबारे विस्तृत छानबिन भइरहेको र यो जातीय विभेदसँग सम्बन्धित हो वा व्यक्तिगत विवादको परिणाम भन्ने विषयमा प्रहरीले स्पष्ट पार्न बाँकी रहेको छ।
यो घटनाले दलित समुदायमाथि हुने हिंसालाई पुनः सतहमा ल्याएको भन्दै स्थानीय अधिकारकर्मीहरूले दोषीमाथि कडा कारबाहीको माग गरेका छन्। प्रहरी प्रशासनले पीडितको सुरक्षाका लागि आवश्यक कदम चाल्ने प्रतिबद्धता जनाउँदै दोषी ठहरिए कानुनी कारबाही गरिने बताएको छ।
