काठमाडौं । यसवर्षको सुपरहिट फिल्म ‘छक्कापञ्जा ५’को गीत ‘बिहे भाको छैन’लाई सोमबारसम्म युट्युवमा १ करोडभन्दा धेरै पटक हेरिएको छ । एकातिर तिहारमा पनि फिल्मले राम्रो कमाइ गरिरहँदा गीतले पनि यो उपलब्धि हासिल गरेको हो ।
दीपक शर्माद्वारा संगीतबद्ध यो गीतमा दीपकराज गिरी र शर्माका शब्द छन् भने गीतमा सविन सुवेदी र बेनिशा पौडेलको स्वर रहेको छ । २ महिनाअघि रिलिज भएको यो गीतले सुरुदेखि नै निकै चर्चा बटुलेको छ ।
गीतलाई करोडपटक हेरिएको सन्दर्भमा गीतकार तथा अभिनेता दीपकराज गिरीले फेसबुकमार्फत उत्साह व्यक्त गरेका छन् । उनी लेख्छन्, ‘बिहान उठ्ने बित्तिकै हेरेको छक्का पन्जा ५को अर्को गीतले पनि १ करोड़ को रेखा पार गरेछ । हाम्रा चलचित्रका गीतहरू र चलचित्रलाइ सधै झैं माया गरि दिनुभएको छ ! यसले हामी हिँडेको सकारात्मकताको बाटो र उद्देश्य अझै मजÞबूत भएको महसूस गरेका छौ । चलचित्र हेर्न छुटेको छ भने अझै पनि हलहरूमा लागिरहेको छ । यहाँहरूको दिन शुभ रहोस !’
संगीतकार शर्मा र निर्देशक दीपाश्री निरौलाले पनि सामाजिक संजालमार्फत करोड पटक हेरिएको यो सन्दर्भमा खुसी व्यक्त गरेका छन् । फिल्मको अर्को गीत ‘ब्रेकअप सङ’लाई २ करोड ४१ लाख पटक हेरिएको छ । यसैसाता फिल्मको अर्को गीत ‘यो माया बनाउने को हो’ पनि सार्वजनिक भएको छ ।
