मङ्गलबार रातिदेखि परेको अविरल वर्षाका कारण बिहीबारबाट हिउँ पर्न थालेको हो । मनाङमा तीन दिनदेखि निरन्तर परेको वर्षाले असोज महिनामै हिउँ पर्न थालेको हो ।
हिउँले डाँडाकाँडा सेताम्मे भएको छ भने चिसो बढेको छ । स्थानियका अनुसार यस वर्ष असोजमै चाँडै हिमपात भएको र अब यो क्रम बढ्दै जाने जानकारी दिनुभयो ।
मनाङ ङिस्याङ गाउँपालिका र नार्पाभूमि गाउँपालिकाका क्षेत्रमा हिउँ परेको छ । माथिल्लो क्षेत्रको थोराङलापास, बेसक्याम्प, याकखर्च, तिलिचो क्षेत्रमा हिमपात भइरहेको छ । मनाङमा सन् २०१४ को अक्टोबर २० मा हिउँ परेको थियो । त्यसपछि अक्टोबर २० भन्दा अघि हिउँ परेको थिएन । यस वर्ष भने अक्टोबर ६ मै हिउँ परेको छ ।
हिमपातका कारण बिजुली बन्द भएको छ । इन्टरनेट पनि प्रभावित छ । मोबाइल नेटवर्कमा समेत समस्या भएको स्थानीयले बताएका छन् ।